অসমৰ মহানগৰীৰ জলপ্ৰলয় এটা গুৰুত্বপূর্ণ সমস্যা হিচাপে দেখা দি আহিছে। সময়ৰ পৰিক্ৰমাত এই ঘটনা ৰোধ হোৱাৰ পৰিৱৰ্তে পুনৰাবৃত্তিহে হৈ আছে। আকৌ গুৱাহাটীত ফুটিল পানীৰ পাইপ ! এইয়া গুৱাহাটীৰ বাবে এক সাধাৰণ ঘটনালৈ পৰিগণিত হৈছে। পুনৰবাৰ গুৱাহাটীৰ পানী যোগান প্রকল্পৰ পাইপৰ জলবিস্ফোৰণে শংকিত কৰি তুলিছে সৰ্বসাধাৰণ নাগৰিকক। কিন্তু গা লৰা নাই কৰ্তিপক্ষৰ, উদাসীন প্ৰশাসন। মহানগবাসী এই আতংকৰ পৰা মুক্ত হব পাৰিবনে ?
গুৱাহাটীত পানীৰ পাইপ মানেই এতিয়া আতংক! ক’ত, কেতিয়া পানীৰ পাইপ ফুটি মানুহৰ জীৱন-সম্পত্তি ধ্বংস হ’ব সেই কথা কোনেও ক’ব নোৱাৰে। পুনৰ এনে ঘটনা সংঘটিত হোৱাৰ আশংকাত এক প্ৰকাৰ শংকাত সময় পাৰ কৰিছে নাগৰিকে৷ বিশুদ্ধ পানী যোগান ধৰাৰ প্ৰতিশ্ৰুতি দি ৰাজ্যত দুবাৰকৈ চৰকাৰ গঠন কৰা বিজেপি দল আৰু চৰকাৰে পানী যোগানত এশ শতাংশই বিফল হোৱাৰ এয়া নিদৰ্শন বুলিও ভিন্নজনে মন্তব্য কৰিছে। জলবিস্ফোৰণৰ ফলত কাৰোবাৰ প্ৰাণ পৰ্য্যন্ত যাব পাৰে। আটোমটোকাৰিকৈ সজা সপোনৰ ঘৰখন চৰকাৰৰ গাফিলতিৰ বাবে নিমিষতে হেৰুওৱাৰ শংকাত ত্ৰস্ত গুৱাহাটীবাসী।
এই কথা নজনালেও ৰাইজ জ্ঞাত যে ইয়াৰ পূৰ্বেও মহানগৰীৰ কেইবাটাও স্থানতে পানীৰ পাইপ ফুটিছে। প্ৰথমতে খাৰঘূলিত ভয়ংকৰ জলবিস্ফোৰণ সংঘটিত হৈছিল। পৰৱৰ্তী সময়ত ৰাজগড়, মালিগাঁও আৰু হাতীগড় চাৰিআলিতো পানী পাইপ ফুটাৰ ফলত অঞ্চলবাসী বিভিন্ন সমস্যাৰ সন্মুখীন হ’ব লগাত পৰা দেখিবলৈ পোৱা গৈছিল। খাৰঘূলিত সংঘটিত হোৱা ভয়ংকৰ জলবিস্ফোৰণৰ ফলত এগৰাকী মহিলাই মৃত্যুক সাৱটিবলগীয়া হৈছিল। এফালে কোনো ঠাইত এই ঘটনাই কালৰূপ ধাৰণ কৰিছে, আকৌ কোনো ঠাইত কৃত্ৰিম বানৰ সৃষ্টি কৰিছে। তথাপিও যেন এনে ঘটনা প্ৰায়েই সংঘটিত হৈ আহিছে। প্ৰশাসনে এনে বিপদৰ পৰা পৰিত্ৰাণ পাবলৈ কি ব্যৱস্থা গ্ৰহণ কৰিছে বা কৰিব সেয়া এতিয়াও স্পষ্ট হোৱা নাই। কিয়নো বাৰম্বাৰ সংঘটিত এনে ঘটনাই মানুহৰ যথেষ্ট ক্ষয়-ক্ষতি কৰিছে যদিও এই সমস্যা ৰোধত সম্পূৰ্ণৰূপে ব্যৰ্থ হোৱা পৰিলক্ষিত হৈছে।
মহানগৰীত ইটোৰ পিছত সিটোকৈ সংঘটিত এনে ভয়ংকৰ জল বিস্ফোৰণৰ পিছতো নাচোৰবান্দা হিমন্ত বিশ্ব শৰ্মাৰ চৰকাৰ৷ চৰকাৰৰ এনে হেমাহিৰ বাবে যে সাধাৰণ জনতাৰ কেনেধৰণৰ অশান্তিৰ সৃষ্টি হৈছে , সেইয়া বিচাৰ্য্যৰ বিষয় নহয় মুখ্যমন্ত্ৰীৰ বাবে । তেওঁৰ ভাষ্য আকৌ তেনেই টুলুঙা । মুখ্যমন্ত্ৰীৰ মতে পানীৰ পাইপ দিল্লী, কেৰালাতো ফুটে ৷ পানীৰ পাইপ ফুটাটো কোনেও ৰাখিব নোৱাৰে । তেওঁ কয় যে পানীৰ পাইপ ফুটাটো সমস্যা নহয়, পানীৰ পাইপ ফুটাৰ লগে লগে পানীৰ যোগান ব্যাহত কৰিব লাগে । খাৰঘুলিত পানী পাইপ ফুটিছিল আৰু ৩-৫ মিনিটৰ ভিতৰত পাইপ বন্ধ কৰিব লাগিছিল৷ কিন্তু বন্ধ কিয় নহ’ল সেইটোহে সমস্যা৷
ৰাজ্য চৰকাৰে এফালে “এডভাণ্টেজ অসম”ৰ নামত উন্নয়নৰ জয়ঢোল বজাইছে, আনফালে আকৌ পাইপ ফুটি পানীয়ে জ্বলা-কলা দেখুৱাইছে সাধাৰণ জনতাক। এই ধৰণৰ পুনৰাবৃত্তি ঘটনা ৰোধ কৰিবলৈ আৰু মহানগৰীৰ বাসিন্দাসকলৰ সুৰক্ষা নিশ্চিত কৰিবলৈ প্ৰয়োজনীয় ব্যৱস্থা গ্ৰহণ কৰা অত্যন্ত জৰুৰী।এই আতংকৰ শেষ সম্পূৰ্ণৰূপে নিৰ্ভৰ কৰে মহানগৰীৰ পৰিকাঠামো উন্নয়ন আৰু প্ৰশাসনৰ তৎপৰতাৰ ওপৰত। যদি পানী যোগান ব্যৱস্থাৰ আধুনিকীকৰণ, নিয়মীয়া পৰীক্ষা-নিৰীক্ষা আৰু সংৰক্ষণৰ উপযুক্ত ব্যৱস্থা গ্ৰহণ কৰা হয়, তেন্তে এই সমস্যা কমিব পাৰে। দীৰ্ঘম্যাদী পৰিকল্পনা, উন্নত প্ৰযুক্তিৰ ব্যৱহাৰ, আৰু প্ৰশাসনিক সচেতনতা বৃদ্ধি, পানী যোগান ব্যৱস্থাৰ আধুনিকীকৰণ, নিয়মীয়া পৰীক্ষা-নিৰীক্ষা আৰু সংৰক্ষণৰ উপযুক্ত ব্যৱস্থা গ্ৰহণ কৰা হয় তেন্তে এই সমস্যাৰ শেষ সম্ভৱ।
