আজিৰ ইণ্টাৰনেট জগতত সকলোৰে হাতত স্মাৰ্ট ফোন থকাটো কোনো ডাঙৰ কথা নহয়, নথকটোহে আজিৰ দিনত আচৰিত কথা । আমাৰ চৌপাশে ঘণ্টাৰ পিছত ঘণ্টা ইনষ্টাগ্ৰাম, টিকটক বা অন্যান্য ছ’চিয়েল মিডিয়া প্লেটফৰ্মত ৰিল চাই থাকে। চিন্তা নকৰাকৈয়ে ঘণ্টাৰ পিছত ঘণ্টা স্ক্ৰল কৰি থকা। বহু সময়ত এনে ভিডিঅ’ আমাৰ বাবে কোনো কামত নাহে। যদি আপোনাৰ ওচৰ-চুবুৰীয়া কোনোবাই এই কাম কৰি আছে বা আপুনি নিজেই এই কাম কৰে তেন্তে হয়তো আপুনি ‘মগজুৰ পচন’ (Brain rot) ত ভুগি আছে। মগজু পচি বৌদ্ধিক ক্ষমতা ক্ষয় কৰি থকা এক বিপদজনক নিচাৰ কবলত। অক্সফৰ্ড অভিধানে এই শব্দটোক ২০২৪ চনৰ বছৰৰ শব্দ হিচাপে ঘোষণা কৰিছে।
“ব্ৰেইন ৰট” হৈছে এনে এটা শব্দ যিয়ে এই ধাৰণাক বুজায় যে নিম্নমানৰ বা প্ৰত্যাহ্বানহীন অনলাইন বিষয়বস্তু গ্ৰহণ কৰিলে ব্যক্তিৰ মানসিক অৱস্থা বা বুদ্ধিমত্তাত নেতিবাচক প্ৰভাৱ পৰিব পাৰে। বিশেষকৈ অনলাইনত বৃহৎ পৰিমাণৰ অৰ্থহীন বস্তু গ্ৰহণ কৰাৰ ফলত মানুহৰ মানসিক অৱস্থা বা বুদ্ধিমত্তাৰ কথিত দুৰ্বলতাকে “ব্ৰেইন ৰট” বোলে। অক্সফৰ্ড ইউনিভাৰ্চিটি প্ৰেছৰ মতে এই শব্দটোৰ প্ৰথম লিপিবদ্ধ ব্যৱহাৰ হৈছিল ১৮৫৪ চনৰ হেনৰী ডেভিদ থ’ৰ’ৰ ৱাল্ডেন নামৰ কিতাপ খনত। থ’ৰ’ৱে বৌদ্ধিক মানদণ্ডৰ হ্ৰাস বুলি ভবা কথাটোক সমালোচনা কৰিছিল, জটিল ধাৰণাসমূহক কম উচ্চভাৱে গণ্য কৰা হৈছিল আৰু ইয়াক ইউৰোপৰ ১৮৪০ চনৰ ” পঁচা আলু “ৰ সৈতে তুলনা কৰিছিল। অনলাইনৰ মাধ্যমত ইয়াক ২০০৪ চনৰ পৰাই ব্যৱহাৰ কৰা হৈছিল। ২০০৭ চনত টুইটাৰ ব্যৱহাৰকাৰীসকলে ডেটিং গেম শ্ব’, ভিডিঅ’ গেম আৰু “অনলাইনত আড্ডা দিয়া” আদি বুজাবৰ বাবে শব্দটো ব্যৱহাৰ কৰিছিল । ২০১০ চনত এই বাক্যাংশৰ ব্যৱহাৰ অনলাইনত যথেষ্ট বৃদ্ধি পায় আৰু ২০২৩ চনত ই দ্ৰুতগতিত অধিক জনপ্ৰিয় হয়, যেতিয়া ই সামাজিক মাধ্যমৰ ব্যৱহাৰকাৰীৰ পৰিচিত ইণ্টাৰনেট মিমত পৰিণত হয়।
ব্ৰেইন ৰ’টৰ অৰ্থ হৈছে ডিজিটেল মাধ্যমৰ অত্যধিক ব্যৱহাৰ, বিশেষকৈ মনোৰঞ্জনৰ বাবে অৱাবত অত্যাধিক সময় কটায়। যিয়ে আমাৰ চিন্তাশীল মনত নেতিবাচক প্ৰভাৱ পেলায়। অক্সফৰ্ড ইউনিভাৰ্চিটি প্ৰেছে ২০২৪ চনৰ অক্সফৰ্ডৰ বছৰৰ শব্দ হিচাপে ঘোষণা কৰিছে ‘ব্ৰেইন ৰট’ ।২০২৪ চনৰ বছৰৰ শব্দৰ বাবে নিৰ্বাচন প্ৰক্ৰিয়াত অক্সফৰ্ড বিশ্ববিদ্যালয়ে প্ৰস্তুত কৰা ছটা শব্দৰ চৰ্টলিষ্টৰ পৰা ৩৭ হাজাৰৰো অধিক ৰাজহুৱা ভোট লাভ কৰিছিল। ‘ব্ৰেইন ৰ’ট’ শব্দটোৱে মানসিক স্বাস্থ্যৰ ওপৰত প্ৰভাৱ পেলাব পৰা তুচ্ছ ছ’চিয়েল মিডিয়া কন্টেন্টক কেন্দ্ৰ কৰি ক্ৰমাৎ বৃদ্ধি পোৱা উদ্বেগক স্পষ্ট কৰে। অক্সফোৰ্ড বিশ্ববিদ্যালয় প্ৰেছৰ মতে ‘ব্ৰেইন ৰ’ট’ য়ে প্ৰযুক্তিয়ে মানুহৰ চিন্তা প্ৰক্ৰিয়া আৰু অভ্যাসক কেনেদৰে গঢ় দিছে সেই লৈ ক্ৰমাৎ বৃদ্ধি পোৱা চিন্তাক প্ৰতিফলিত কৰিছে। শেহতীয়া বছৰবোৰত বিশেষকৈ কম বয়সীয়া জনগাঁথনিৰ মাজত ইয়াৰ ব্যৱহাৰ বৃদ্ধি পাইছে। অতিমাত্ৰা ভিডিঅ’ চোৱা, ডুমস্ক্ৰলিং বা নিম্নমানৰ অনলাইন বিষয়বস্তুৰ সৈতে জড়িত হোৱাৰ ফলত হোৱা মানসিক ক্লান্তিৰ বৰ্ণনা কৰে। ব্ৰেইন ৰ’ট য়ে আধুনিক যুগৰ এটা গুৰুত্বপূৰ্ণ বিষয়লৈ ভাষিক লেন্স হিচাপে কাম কৰে, ডিজিটেল অভ্যাসে মানসিক সুস্থতাক প্ৰভাৱিত কৰি ব্যক্তিৰ মানসিক বা বৌদ্ধিক অৱস্থাৰ অৱনতি ঘটায়। প্ৰায়ে আমাৰ মন মগজু বিচলিত হয়। বৰ্তমান সময়ত এই চিকাৰৰ পৰা ওলাই আহিব পৰাটো হে প্ৰত্যাহ্বান হৈ পৰিছে।
