ঋণ নোলোৱাকৈ ৰাজ্য চলাব নোৱাৰা হৈছে চৰকাৰে। সপ্তাহে প্ৰতি ঋণ লৈছে অসম চৰকাৰে৷ উদং হৈ পৰিছে নেকি ৰাজ্যৰ ৰাজকোষ ? ধনৰ প্ৰয়োজন হৈয়ে আছে অসম চৰকাৰক, কিন্তু কিয় তাক লৈ প্ৰশ্ন উত্থাপন হৈছে। ছেপ্টেম্বৰত মাহৰ ১৭ তাৰিখে ১০০ কোটি টকা আকৌ ২৪ ছেপ্টেম্বৰত ২৫০ কোটি টকা ঋণ লোৱাৰ পাছত একেই প্ৰক্ৰিয়াৰে ১ অক্টোবৰত ৭৫০ কোটি টকা ঋণ লোৱাৰ বাবে ব্যৱস্থা কৰিছিল হিমন্ত বিশ্ব শৰ্মা নেতৃত্বাধীন চৰকাৰে যাৰ মুঠ পৰিমাণ হ’বগৈ ১.৫ লাখ কোটিৰো অধিক। উন্নয়নৰ ঢাক-ঢোল বজাই ৰাজহ সংগ্ৰহৰ অৰ্থে বৃদ্ধি কৰি গৈছে বিভিন্ন সামগ্ৰীৰ মূল্য। চৰকাৰে যধে-মধে হিতাধিকাৰী সৃষ্টি কৰি কেৱল মানুহৰ মাজত আলোড়ন সৃষ্টি কৰি কেৱল ভোট বেংক সৃষ্টি কৰাৰ চলিছে প্ৰৱণতা। শেহতীয়াকৈ হিমন্ত বিশ্ব শৰ্মাৰ চৰকাৰৰ অসমত যিটো হাৰত ঋণৰ বোজা বাঢ়িছে সেয়া হৈ পৰিছে ভয়াৱহ। হিতাধিকাৰী ৰাজনীতিক কেন্দ্ৰ কৰি ঋণগ্ৰস্ততাৰ বোজা বহন কৰি আহিছে।মাহে মাহে ঋণ লোৱা এই ধন কিমান ৰাইজৰ স্বাৰ্থত ব্যৱহাৰ কৰা হৈছে নে কোনো উৎপাদনশীল কামৰ বিপৰীতে ভোটৰ অংকত ব্যয় কৰিছে এই টকা, সেইয়া এক চিন্তনীয় বিষয় হৈ পৰিছে। ৰাইজক ঋণৰ টকাৰে পইছা দি ৰাইজৰ পৰাই দুগুণ ধন লাভ কৰাৰ উদেশ্য নেকি চৰকাৰৰ।
ৰিজাৰ্ভ বেংকৰ বাৰ্ষিক প্ৰতিবেদনত অসমৰ বিত্তীয় অৱস্থা সংকটজনক। চৰকাৰে ঋণলৈ ৰাজ্যবাসীক ‘অমৃত’ৰ সোৱাদ দিছে। এক কথাত আজিৰ তাৰিখত টেটুলৈকে ঋণত পোত গৈ কক্কাবলগীয়া হৈছে অসম চৰকাৰ। অসমৰ ৰাজকোষৰ শোচনীয় অৱস্থাৰ প্রকৃত ছবিখন উন্মোচন হৈছে ৰিজাৰ্ভ বেংক অৱ ইণ্ডিয়াৰ বাৰ্ষিক প্রতিবেদনত। ৰিজাৰ্ভ বেংকে ৰাজহুৱা কৰা ‘ভাৰতৰ ৰাজ্যসমূহৰ পৰিসংখ্যাগত হাতপুথি 2023-24’ শীৰ্ষক প্ৰতিবেদনৰ পৃষ্ঠাই পৃষ্ঠাই অসমৰ বিত্তীয় অৱস্থাৰ বাস্তৱ অৱস্থাৰ প্ৰতিফলন ঘটিছে। ৰিজাৰ্ভ বেংকৰ প্রতিবেদনখনত প্ৰকাশ পোৱা অনুসৰি 2023-24 বিত্তীয় বৰ্ষৰ অন্তত অর্থাৎ চলিত বৰ্ষৰ বিগত ৩১ মার্চ পর্যন্ত অসমৰ মুঠ ঋণৰ পৰিমাণ হৈছে ১,৫০,৯০০ কোটি টকা। অর্থাৎ অসমৰ ধাৰৰ বোজাই এতিয়া ডেৰ লাভ কোটি টকা অতিক্ৰম কৰিলে। ৰিজাৰ্ভ বেংকৰ তথ্য অনুসৰি ২০১৬ চনত প্ৰাক্তন মুখ্যমন্ত্ৰী তৰুণ গগৈ চৰকাৰৰ কাৰ্যকালত অসমৰ মুঠ ঋণৰ পৰিমাণ আছিল ৪১,৯৬৪ কোটি টকা। আনহাতে ২০২১ চনত মুখ্যমন্ত্ৰী সৰ্বানন্দ সোণোৱালৰ বিজেপি চৰকাৰৰ কাৰ্যকালত অসমৰ ঋণৰ পৰিমাণ বৃদ্ধি পাই হয়গৈ ৮৯,৭০৯ কোটি টকা। অর্থাৎ প্রাক্তন মুখ্যমন্ত্রী সর্বানন্দ সোণোৱাল চৰকাৰে পাঁচ বছৰত বিভিন্ন উৎসৰ পৰা ঋণ লয় ৪৮,৮০১ কোটি টকা। ইয়াৰ বিপৰীতে 2021 চনত মুখ্যমন্ত্ৰী হিমন্ত বিশ্ব শৰ্মা চৰকাৰে দায়িত্ব লোৱাৰ পাছৰে পৰা চলিত বৰ্ষৰ ৩১ মার্চ পর্যন্ত অসমৰ সৰ্বমুঠ ঋণৰ পৰিমাণে স্পৰ্শ কৰে ১,৫০,৯০০ কোটি টকা। নক’লেও হ’ব যে মুখ্যমন্ত্ৰী হিমন্ত বিশ্ব শৰ্মাৰ চৰকাৰে তিনিবছৰে ঋণ লয় ৬১,১৯১ কোটি টকা। চলিত বৰ্ষৰ প্ৰতিটো মাহতে ৰাজ্য চৰকাৰে অতিৰিক্তভাৱে গড়ে প্রায় ১,০০০- ১,৫০০ কোটি টকাকৈ ঋণ লোৱা পৰিলক্ষিত হৈছে। প্ৰতিবেদনখনত প্রকাশ পোৱা মতে অসম চৰকাৰৰ আৰ বি আইৰ জৰিয়তে ষ্টক নিলাম কৰি ৰাজ্যিক উন্নয়ন ঋণ শিতানতে সর্বাধিক ৯৭,৮৬৯ কোটি টকা ধাৰ লৈছে। তদুপৰি নাবাৰ্ডৰ পৰাও ৮,৯৮৬ কোটি টকা ঋণ গ্রহণ কৰিছে। ইয়াৰোপৰি কেন্দ্ৰীয় চৰকাৰৰ পৰা ১২,৪৯৯ কোটি টকা, ভৱিষ্যনিধিৰ পৰা ১৪,৬৯৮ কোটি টকা আৰু অন্যান্য বেংকৰ পৰাও ৮,৯৯৭ কোটি টকা ঋণ লৈছে। লক্ষণীয় বিষয়টো হৈছে এই বৃহৎ অংকৰ ঋণৰ বাবদ মাত্ৰ এবছৰতে অসম চৰকাৰে ৰাজকোষৰ পৰা সুদ পৰিশোধ কৰিবলগীয়া হ’ল ৮,৮১৫ কোটি টকা। ৰাজ্যত এতিয়া প্ৰতিবছৰে ঋণৰ বিপৰীতে সুদৰ পৰিমাণ বৃদ্ধি পোৱা পৰিলক্ষিত হৈছে। বিজেপি-মিত্ৰজোঁটৰ চৰকাৰৰ বিগত ৮ বছৰীয়া কাৰ্যকালত ধাৰ-ঋণৰ বাবদ ৰাজকোষৰ পৰা সুদ পৰিশোধ কৰিলে ৪২,০৬১ কোটি টকা। ইয়াৰ ভিতৰত সৰ্বানন্দ সোণোৱাল চৰকাৰৰ কাৰ্যকালত ১৯,৬৫১ কোটি টকা সুদ ভৰিবলগীয়া হোৱাৰ বিপৰীতে মুখ্যমন্ত্ৰী হিমন্ত বিশ্ব শৰ্মাৰ কাৰ্যকালত বাকী ২২,৪১০ কোটি টকা সুদ পৰিশোধ কৰিবলগীয়া হয়।
