ইফালে হিতাধিকাৰী সৃষ্টি, আনফালে সুৰা বিপনন বৃদ্ধিৰে ৰাইজক মূৰ্খ সজাই আহিছে এইখন চৰকাৰে। যি সময়ত সুৰামুক্ত অসম গঢ়ি তুলিব লাগিছিল সেই সময়তে ৰাজ্য চৰকাৰৰ সহযোগত হৈ পৰিছে সুৰাযুক্ত অসম। ৰাজ্যত বৃদ্ধি হৈয়েই আছে সুৰাৰ বিপনী। তীব্ৰ আৰ্থিক সংকটত ভুগা ৰাজ্য চৰকাৰৰ বাবে বিত্তীয় সংকট জোৰা মৰাৰ বাবে অতিৰিক্ত ৰাজহৰ সংগ্ৰহ কৰি ৰাজ্য চৰকাৰে গ্ৰহণ কৰিছে এটাৰ পাছত আনতো পদক্ষেপ। সেয়া লাগিলে বয়-বস্তুৰ দাম বৃদ্ধি, বিভিন্ন জৰিমণায়ে নহওক কিয়। মন্ত্ৰী পৰিমল শুকবৈদ্যই কৈছিল চুলাইতকৈ বিলাতী সুৰা সেৱন কৰা বেছি ভাল। তেওঁৰ বাবে চুলাইতকৈ বিলাতী সুৰা সেৱন কৰা উচিত, নহলে ৰাজহ সংগ্ৰহ হব কৰ পৰা। সুৰা সমাজৰ বাবে বৰবিহ স্বৰূপ। চৰকাৰে যদিও ৰাজহ সংগ্ৰহৰ বাবে যথেষ্ট পৰিমাণৰ সুৰা বিপণীৰ অনুমতি দিছে, তথাপি এয়া অনস্বীকার্য যে সুৰাই আমাৰ নতুন প্রজন্মক কোঙা কৰি থৈ যাব। এসময়ত অসমত কানিয়ে বৰবিহ হৈ এটা প্রজন্ম শেষ কৰি দিছিল, ঠিক তেনেকৈয়ে সুৰায়ো যে আমাৰ কঁকালত মাধমাৰ শোধাব সেইটো ধুৰুপ। অত্যধিক পৰিমাণৰ সুৰাৰ ব্যৱহাৰে যথেষ্ট পৰিমাণে শাৰীৰিক ক্ষতিসাধন কৰে।
যোৱা ৯ বছৰত ৰাজ্য চৰকাৰে সুৰাৰ পৰা ৰাজহ আহৰণ কৰিছে ২৭,০২৯.০৬ কোটি টকা। তথ্য মতে অসম চৰকাৰে ২০১৯-২০ চনত ২৬০৬.৬৪ কোটি টকা আবকাৰী ৰাজহ সংগ্ৰহ কৰে। ঠিক সেইদৰে ২০২০-২০২১ চনত মুঠ ২৯৭৭.৬১ কোটি টকা, ২০২১ ৰ বিত্তীয় বৰ্ষত ৩,০০০ কোটি টকা আছিল, ২০২১-২২ বর্ষত ৩০৪৭.৯৮ কোটি টকা, ২০২২-২৩ বর্ষত ৩৯৮০.০৬ কোটি টকা, ২০২৩-২৪ বর্ষত ৪৭৮৯.৭৩ কোটি টকা, ২০২৪-২৫ বর্ষৰ জানুৱাৰীলৈ ৪২৮১.৪৮ কোটি টকা ৰাজ্যখনত সুৰা বিক্ৰীৰ পৰা সংগ্ৰহ কৰা ৰাজহৰ পৰিমান।
বিধানসভাত আৱকাৰী বিভাগৰ মন্ত্ৰী পৰিমল শুক্লবৈদ্যই প্ৰকাশ কৰা তথ্য অনুযায়ী অসমত বর্তমান বিদেশী সুৰাৰ দোকান (IMFL OFF) ১৭০৭ খন, বাৰ (IMFL ‘ON’) ৯২৩ খন আৰু দেশীয় সুৰাৰ দোকান (Country spirit)ৰ ৩৭৩ খন । অসমত বৰ্তমান মুঠ ৩০০৩ খন সুৰাৰ দোকান আছে। ইয়াৰে সুৰাৰ দোকান ১৭০৭ খন, বাৰ ৯২৩ খন আৰু দেশীয় সুৰাৰ দোকান ৩৭৩ খন । বিলাতী সুৰাৰ বিপণী আছে ১,৮৩৬ খন , আনহাতে বাৰ আছে ১,০৬০ খন। বিজেপি শাসনলৈ অহাৰ পিচত অর্থাৎ ২০১৬ চনৰ পৰা ৰাজ্যত নতুনকৈ গঢ় লৈ উঠিছে ১৫০ খন বিলাতী সুৰাৰ বিপণী আৰু ৭১১ খন বাৰ।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্র্যালয়ে শেহতীয়াভাৱে কৰা ৰাষ্ট্ৰীয় সমীক্ষা অনুসৰি ১৫ বছৰ বয়সৰ পৰা ৪৯ বছৰ বয়সলৈকে ৰাষ্ট্ৰীয় মহিলা সুৰাপায়ীৰ শতকৰা হাৰ হৈছে ১.২ শতাংশ। আনহাতে, এই ৰাষ্ট্ৰীয় শতকৰা হাৰৰ বিপৰীতে আমাৰ অসমৰ মহিলা সুৰাপায়ীৰ শতকৰা হাৰ ১৬.৫ শতাংশ। অসমৰ পাছতেই তালিকাৰ দ্বিতীয় স্থানত আছে উত্তৰ-পূৰ্বাঞ্চলৰ মেঘালয় ৰাজ্য। এই ৰাজ্যৰ মহিলা সুৰাপায়ীৰ শতকৰা হাৰ ৮.৭ শতাংশ। তালিকাখনত তৃতীয় স্থানত আমাৰে একেবাৰে কাষত থকা চুবুৰীয়া ৰাজ্য অৰুণাচল প্রদেশ। ৰাজ্যখনৰ মহিলা সুৰাপায়ীৰ শতকৰা হাৰ ৩.৩ শতাংশ। তালিকাখনৰ মতে চতুর্থ স্থানত আছে আমাৰে উত্তৰ-পূৰ্বাঞ্চলৰ এখন সৰু ৰাজ্য চিক্কিম। ৰাজ্যখনৰ মহিলা সুৰাপায়ীৰ শতকৰা হাৰ ০.৩ শতাংশ।
ভাৰতত সুলভ হ’ল বিলাতী সুৰা। প্রধানমন্ত্রী নৰেন্দ্ৰ মোদীৰ আমেৰিকা ভ্ৰমণৰ মাজতে ভাৰতত বাৰ্বন হুইস্কী’ৰ আমদানি শুল্ক ৬৬.৬ শতাংশ হ্রাস কৰা হৈছে। উল্লেখ্য যে আমেৰিকা ভ্রমণ কালত ৰাষ্ট্ৰপতি ড’নাল্ড ট্রাম্পৰ সৈতে হোৱা প্ৰধানমন্ত্ৰীৰ বৈঠকত শুল্কক লৈ আলোচনা হৈছিল। উক্ত আলোচনাত ট্রাম্পে স্পষ্ট কৰি দিয়ে যে ভাৰতে আমেৰিকাৰ বন্যৰ ক্ষেত্ৰত যি হাৰত শুল্ক আৰোপ কৰে, আমেৰিকায়ো ভাৰতৰ পণ্যৰ ক্ষেত্ৰত সম পৰিমাণৰ শুল্ক আৰোপ কৰিব।
সুৰাৰ অত্যধিক বিক্রীয়ে নৱ প্রজন্মক ধ্বংসৰ গৰাহলৈ ঠেলি দিয়াটো এশ শতাংশই সঁচা। শেহতীয়া তথ্য অনুযায়ী অসমতে চল্লিশৰ তলৰ বহু লোক কর্কট ৰোগত আক্রান্ত হৈছে। ইয়াৰ অন্যতম কাৰক অত্যধিক পৰিমাণৰ সুৰাপান। সাম্প্রতিক সময়ত অসমত পুথিভঁৰালৰ সংখ্যা আঙুলিৰ মূৰত গণিব পৰা বিধৰ। ‘পুথিভঁৰালে পঢ়ুৱৈ গঢ়িব, সমাজ গঢ়িব আৰু সুৰাই আমাক প্ৰজন্মৰ পিছত প্রজন্ম নিঃশেষ কৰিব।’ সিদ্ধান্তসমূহ আমাৰ হাততে আছে। এইক্ষেত্ৰত সমাজৰ প্রতিজন লোকেই আগবাঢ়ি অহা উচিত। “সুৰা মুক্ত অসম” বা মদ-মুক্ত অসম এটা সম্ভাৱনা হ’ব পাৰে, কিন্তু ইয়াৰ বাবে সচেতনতা, কঠোৰ আইন প্ৰয়োগ, আৰু সামাজিক পৰিৱৰ্তনৰ প্রয়োজন। এনেকৈয়ে চলি থাকিলে অসম খন সম্পূৰ্ণৰূপে হৈ পৰিব সুৰাযুক্ত অসম, যি অত্যন্ত এক ভয়াবহ শংকা। গতিকে আহকচোন এখন সুৰামুক্ত অসম গঢ়ো।
