উন্নত স্বাস্থ্য সেৱা দেশৰ জনসাধাৰণৰ প্ৰাপ্য অধিকাৰ। কিন্তু এই অধিকাৰৰ পৰা আজিও বঞ্চিত হৈ আছে সৰ্বসাধাৰণ। বৰ্তমান সময়ত ভাৰতৰ আনুমানিক জনসংখ্যা ১৪৩ কোটিৰো অধিক। এই বৃহৎ জনসংখ্যাৰ সামগ্ৰিক উন্নয়নত যথেষ্ট প্ৰত্যাহ্বান আছিল, এতিয়াও আছে। ভাৰতত স্বাস্থ্য সেৱাৰ পৰিসৰে যথেষ্ট অসুবিধাৰ সন্মুখীন হৈছে, বিশেষকৈ আঞ্চলিক আৰু গ্ৰাম্য অঞ্চলসমূহত। পৰ্যাপ্ত বিছনা, চিকিৎসা সুবিধা আৰু চিকিৎসকৰ অভাৱ এক গুৰুত্বপূর্ণ সমস্যা হৈছে। The South First নামৰ এটা ৱেবচাইটত প্ৰকাশিত তথ্য অনুসৰি ভাৰতৰ প্ৰতি ১০০০ জন ব্যক্তিৰ বিপৰীতে নাই এখনো বিচনা। এই ৱেবচাইটত প্ৰকাশিত তথ্য অনুসৰি ভাৰতত আজিৰ তাৰিখত প্ৰতি ১০০০ জন ব্যক্তিৰ বিপৰীতে আছে মাত্ৰ ০.৭৯ খন বিচনা।
অসমো ইয়াৰ ব্যতিক্ৰম নহয়, যদিও অসমত চিকিৎসা মহাবিদ্যালয় আৰু হাস্পতালৰ সংখ্যা বৃদ্ধি পাইছে, তেন্তে পৰিসৰে সেই বৃদ্ধি অনুযায়ী জনসাধাৰণৰ বাবে পৰ্যাপ্ত চিকিৎসা সুবিধা আৰু বিছনাৰ অভাৱ এক গুৰুত্বপূর্ণ সমস্যাৰূপে পৰিগণিত হৈছে। অসমত চিকিৎসালয় আৰু হাস্পতালৰ পৰিমাণ বৃদ্ধি পাইছে, কিন্তু আধুনিক চিকিৎসা সুবিধা, চিকিৎসক, নাৰ্ছ, আৰু অন্যান্য জনশক্তিৰ অভাৱ আছে।
দেশৰ লগতে ৰাজ্যৰ চিকিৎসালয়ত নাই পৰ্যাপ্ত বিচনা। তথ্য অনুসৰি অসমত প্ৰতি ১০০০ জন ব্যক্তিৰ বিপৰীতে আছে মাত্ৰ ০.৫১ খন বিচনা। অৰ্থাৎ প্ৰতি ১০০০ জন ব্যক্তিৰ বিপৰীতে অসমৰ ব্যক্তিগত আৰু চৰকাৰী খণ্ডৰ চিকিৎসালয় মিলায়ো নাই এখনো বিচনা। সৰ্বভাৰতীয় প্ৰেক্ষাপটতো একেই অৱস্থা। প্ৰতি ১০০০ জন ব্যক্তিৰ বিপৰীতে যিমান সংখ্যক বিচনা থাকিব লাগে সিমান নাই। The Institute Montaigne নামৰ এটা ৱেবচাইটৰ তথ্য অনুসৰি ভাৰতৰ মুঠ চৰকাৰীখণ্ডৰ চিকিৎসালয়ৰ সংখ্যা হৈছে ২৫,৭৭৮ খন। ইয়াৰ বিপৰীতে ব্যক্তিগতখণ্ডৰ চিকিৎসালয় আছে ৪৩,৪৮৬ খন। চৰকাৰীখণ্ডৰ চিকিৎসালয়সমূহত আছে ৭১৩,৯৮৬ খন সাধাৰণ বিচনা। তাৰোপৰি আছে ৩৫,৭০০ আই চি ইউ আৰু ১৭,৮৫০ খন ভেণ্টিলেচন। ব্যক্তিগতখণ্ডৰ ৪৩,৪৮৬ খন চিকিৎসালয়ত আছে মুঠ ১.১৮ মিলিয়ন বিচনা। ইয়াত আই চি ইউ আছে ৫৯,২৬৪ আৰু ভেণ্টিলেচন আছে ২৯,৬৩১ খন। অৰ্থাৎ দেশৰ স্বাস্থ্যখণ্ডৰ মুঠ আন্তঃগাঁথনিৰ ৬২ শতাংশই আছে ব্যক্তিগতখণ্ডৰ হাতত। দেশৰ স্বাস্থ্যখণ্ডৰ এনে দৃশ্যপটৰ বিপৰীতে অসমত আকৌ ব্যক্তিগতখণ্ডৰ চিকিৎসালয় আছে মুঠ ৩০৩খন ।এই তথ্য উপলব্ধ আছে অসম চৰকাৰৰ অটল অমৃত অভিযানত।
গুৱাহাটী মেডিকেল কলেজ হাস্পতালৰ ৱেবচাইটত উপলব্ধ তথ্য অনুসৰি জি এম চি এইছত আছে ২৪৮৫ খন সাধাৰণ বিচনা। চিকিৎসালয়খনত আছে ৬০০ খন আই চি ইউ বিচনা। জি এম চি এইছৰ ৱেবচাইটত থকা তথ্য অনুসৰি ৰাজ্যিক কৰ্কট প্ৰতিষ্ঠানত ২০০ খন, PMSSY Scheme অধীনত থকা জি এম চি এইছৰ ছুপাৰস্পেচিয়েলিটি হাস্পতালত ২৮০ খন, Cardiothoracic & Neuroscience Centre ত ৩০০ খন বিচনা আছে।
মন কৰিবলগীয়া যে, অসমত মুঠ চিকিৎসা মহাবিদ্যালয় হাস্পতালৰ সংখ্যা বৰ্তমান ১৩ খন। চৰকাৰী তথ্য অনুসৰি অসমত বৰ্তমান ৩৫ খন জিলাৰ ভিতৰত ২৫ খন জিলাত আছে জিলা পৰ্যায়ৰ চিকিৎসালয়। সেইদৰে ছাব ডিভিজনেল হাস্পতাল আছে ১৪ খন। চি এছ চি এছ আছে ১৫১ খন, পি এইছ চি ১০১৪ খন আৰু ছাব চেণ্টাৰ আছে ৪৬২১ খন। কেন্দ্ৰীয় স্বাস্থ্য মন্ত্ৰী জেপি নড্ডাই সংসদত ২০২৪ ৰ শেষৰফালে সংসদত উল্লেখ কৰা মতে ২০২১ চনৰ ৩১ মাৰ্চ পৰ্যন্ত ভাৰতৰ প্ৰাথমিক স্বাস্থ্য কেন্দ্ৰ, সামূহিক স্বাস্থ্য কেন্দ্ৰ, মহকুমা হাস্পতাল, জিলা হাস্পতাল আৰু মেডিকেল কলেজ মিলাই আছে মুঠ ৮,১৮,৬৬১ খন বিচনা।
উত্তৰ পূৰ্বাঞ্চলৰ ৰাজ্য কেইখনৰ ভিতৰত স্বাস্থ্য আন্তঃগাঁথনিত অসমেই উন্নত। অসমত যথেষ্ট চৰকাৰী চিকিৎসা মহাবিদ্যালয় চিকিৎসালয়কে ধৰি অন্যান্য চিকিৎসালয় নিৰ্মাণ হৈছে। কিন্তু তাৰ পাছতো অসমৰ স্বাস্থ্য আন্তঃগাঁথনি আজিও যথেষ্ট দুৰ্বল। দেশৰ আন ৰাজ্যৰ তুলনাত অসমৰ অৱস্থা যথেষ্ট সূচনীয়। অসমৰ প্ৰতি ১০০০ জন ব্যক্তিৰ বিপৰীতে চিকিৎসালয়ত বিচনা আছে মাত্ৰ ০.৫১ খন। উত্তৰ পূৰ্বাঞ্চলৰ বাকীকেইখন ৰাজ্যত প্ৰতি ১০০০ জন ব্যক্তিৰ বিপৰীতে বিচনা আছে মাত্ৰ ০.৫ খন।
উন্নত স্বাস্থ্য সেৱা প্ৰতিৰাষ্ট্ৰৰ নাগৰিকৰ এক মৌলিক অধিকাৰ হ’ব লাগে, কিন্তু বাস্তৱতে বহু লোকেই এই অধিকাৰৰ পৰা বঞ্চিত হৈ আছে। এই সমস্যাসমূহৰ সমাধানৰ বাবে চৰকাৰে বিশেষ ব্যৱস্থা গ্ৰহণ কৰা উচিত। সমাজৰ সকলো শ্ৰেণীৰ লোকে উপকৃত হব পৰাকৈ সুবিধাবোৰ সহজলভ্য হোৱা উচিত। এই উদ্দেশ্যৰ বাবে পৰ্যাপ্ত বাজেট সংৰক্ষণ, স্বাস্থ্য খণ্ডত আধুনিকীকৰণ আৰু নীতিৰ সঠিক কাৰ্য্যকৰী হোৱাৰ বিশেষ প্ৰয়োজন।
