দিনবোৰ যিমানেই পাৰ হৈছে, সিমানেই জুবিন গাৰ্গৰ ন্যায়ৰ প্ৰসংগটো ক্ৰমান্বয়ে ৰাজনৈতিক গোলকধামৰ মাজলৈ গতি কৰিছে। যিজন শিল্পীয়ে নিজৰ সুৰ আৰু সৃষ্টিৰে অসমীয়া জাতিক বিশ্বদৰবাৰত এক সুকীয়া পৰিচয় দিছিল, আজি তেওঁৰ মৃত্যুৰ ন্যায়ৰ বাবে কৰা অপেক্ষাই সমগ্ৰ সমাজখনক মৰ্মাহত কৰি তুলিছে। প্ৰাণৰ শিল্পী জুবিন গাৰ্গৰ ন্যায়ৰ দাবী আজি যেন এক উত্তৰহীন প্ৰশ্নত পৰিণত হৈছে।
“পলিটিক্স নকৰিবা বন্ধু”— এইটো কেৱল জুবিন গাৰ্গৰ এটা সংলাপেই নাছিল, এয়া আছিল তেওঁৰ অন্তৰৰ এক সত্য। তেওঁ সদায় ৰাজনীতিৰ পৰা দূৰত থাকি সমাজৰ হকে মাত মাতিবলৈ চেষ্টা কৰিছিল। কিন্তু পৰিতাপৰ বিষয় এয়ে যে, আজি তেওঁৰ মৃত্যুক কেন্দ্ৰ কৰিহে এক গেলা ৰাজনীতিৰ পৰিৱেশ গঢ়ি উঠিছে। চৰকাৰী পক্ষই প্ৰথমাৱস্থাত যি তৎপৰতা দেখুৱাইছিল, সময়ৰ সোঁতত সেই তৎপৰতা লাহে লাহে স্তিমিত হৈ অহা যেন অনুভৱ হৈছে। মূল অভিযুক্তৰ সম্পত্তি আৰু বেংক একাউণ্টৰ বিষয়বোৰ যেনেকৈ কিছু সময়ৰ বাবে চৰ্চালৈ আহিছিল, সি আজি ৰহস্যজনকভাৱে মৌন হৈ পৰিছে।
জুবিন গাৰ্গ কেৱল এজন কণ্ঠশিল্পী নাছিল; তেওঁ আছিল দুৰ্নীতি, অন্যায় আৰু ক্ষমতাৰ লালসাৰ বিৰুদ্ধে এক বলিষ্ঠ কন্ঠ। সেয়েহে তেওঁৰ মৃত্যুৰ পাছতো এচাম চক্ৰই তেওঁৰ ভাবমূৰ্তি ম্লান কৰিবলৈ আৰু তেওঁৰ ব্যক্তিগত জীৱনক লৈ তুচ্ছ-তাচ্ছিল্য কৰিবলৈ এৰা নাই। যেতিয়াই ন্যায়ৰ দাবী তীব্ৰতৰ হয়, তেতিয়াই এটা নিৰ্দিষ্ট চক্ৰই বিষয়টো অন্য দিশলৈ বোৱাই নিবলৈ অপচেষ্টা চলায়। এয়া এজন জাতীয় শিল্পীক স্তব্ধ কৰাৰ এক পুৰণি কৌশল।
আটাইতকৈ দুৰ্ভাগ্যজনক কথাটো হ’ল, নিৰ্বাচন বা কোনো ডাঙৰ আন্দোলনৰ সময় আহিলেই ৰাজনৈতিক দলবোৰে জুবিনৰ নামটো নিজৰ ভোটবেংক হিচাপে ব্যৱহাৰ কৰিবলৈ চেষ্টা কৰে। শিল্পীজনক তেওঁৰ জীৱিত কালতো বিভিন্ন পক্ষই নিজৰ স্বাৰ্থত ব্যৱহাৰ কৰিব বিচাৰিছিল আৰু এতিয়া তেওঁৰ অনুপস্থিতিতো সেই একেই টনা-আঁজোৰা অব্যাহত আছে।
ন্যায় প্ৰদানৰ ক্ষেত্ৰত চৰকাৰৰ যি কৰণীয় আছিল, সেইয়া সঠিকভাৱে কৰা হৈছে নে নাই— সেইটো এতিয়া এটা ডাঙৰ প্ৰশ্নবোধক চিহ্ন। জুবিন গাৰ্গৰ দৰে এজন বিশাল ব্যক্তিত্বক লৈ চলি থকা এই হেতালি খেলাই যুৱ প্ৰজন্মক বিভ্ৰান্ত কৰিছে। যদি এইদৰেই ৰাজনীতিৰ পাশাখেল চলি থাকে, তেন্তে ভৱিষ্যতে কোনো শিল্পীয়ে সমাজৰ বাবে মুকলিকৈ মাত মাতিবলৈ সাহস নকৰিব। আমাৰ স্পষ্ট দাবী— জুবিন গাৰ্গৰ মৃত্যুক ৰাজনৈতিক ইছ্যু নকৰি, উচিত তদন্তৰ জৰিয়তে তেওঁক সঠিক ন্যায় প্ৰদান কৰা হওক। কাৰণ জুবিন গাৰ্গ কোনো এটা দল বা মতাদৰ্শৰ নাছিল, তেওঁ আছিল সমগ্ৰ অসমীয়া জাতিৰ।
