আজি কাৰ্গিল যুদ্ধৰ অন্যতম বীৰ কেপ্টেইন জিণ্টু গগৈৰ জন্মদিন। তেওঁৰ জীৱনগাথা অটল দেশভক্তি আৰু কৰ্তব্যবোধৰ এক উজ্জ্বল নিদৰ্শন, যিয়ে ভাৰতীয় সেনাৰ সৰ্বোচ্চ আদৰ্শক প্ৰতিফলিত কৰে। অসমৰ এই মহান সুপুত্ৰৰ বীৰত্বৰ কাহিনীয়ে আজিও আমাক অনুপ্ৰাণিত কৰে।
কেপ্টেইন জিণ্টু গগৈৰ ব্যক্তিগত জীৱন আৰু সেনা বাহিনীত যোগদান
কেপ্টেইন জিণ্টু গগৈৰ জন্মস্থান হৈছে গোলাঘাট জিলাৰ খুমটাই। তেওঁৰ পিতৃ সন্মানীয় ফ্লাইং অফিচাৰ ঠগিৰাম গগৈ (ভাৰতীয় বায়ুসেনাৰ প্ৰাক্তন কৰ্মী) আৰু মাতৃ শ্ৰীমতী দুলুপ্ৰভা গগৈ। এনে এটা পৰিয়ালত ডাঙৰ হৈছিল, য’ত শৃংখলা আৰু দেশ সেৱাৰ মূল্য গভীৰভাৱে শিপাইছিল। সৰুৰে পৰাই সশস্ত্ৰ বাহিনীৰ প্ৰতি তেওঁৰ আকৰ্ষণ আছিল আৰু সেনাৰ ইউনিফৰ্ম পিন্ধাৰ সপোন তেওঁৰ শিক্ষা জীৱন জুৰি দৃঢ় আছিল।
স্নাতকোত্তৰ ডিগ্ৰী সম্পূৰ্ণ কৰাৰ পিছত, তেওঁ চেন্নাইস্থিত Officer’s Training Academy (OTA) ত কঠোৰ প্ৰশিক্ষণ লৈ তেওঁ গৰৱাল ৰাইফলছ ৰেজিমেণ্টৰ ১৭ গৰৱাল ৰাইফলছ বেটেলিয়নত লেফটেনেণ্ট হিচাপে নিযুক্তি লাভ কৰে। অতি কম সময়তে তেওঁ নিজকে এজন উচ্চ সম্ভাৱনাশীল সেনাধিনায়ক হিচাপে প্ৰতিষ্ঠা কৰে।
কাৰ্গিল যুদ্ধত কেপ্টেইন জিণ্টু গগৈৰ ভূমিকা
১৯৯৯ চনত পাকিস্তানৰ সৈতে কাৰ্গিল অঞ্চলত সংঘাত আৰম্ভ হোৱাৰ সময়ত, কেপ্টেইন জিণ্টু গগৈ ছুটীত আছিল। কিন্তু দেশৰ প্ৰতি থকা অসাধাৰণ দায়িত্ববোধৰ পৰিচয় দি, বিয়াৰ আঙুঠি পিন্ধোৱাৰ মাত্ৰ ১২ দিন পিছতে তেওঁ ছুটি এৰি যুদ্ধলৈ ৰাওনা হয়।
কেপ্টেইন জিন্টু গগৈৰ ইউনিট, ১৭ গৰৱাল ৰাইফলছ, অপাৰেচন বিজয়ত 70th Infantry Brigade ৰ অধীনত অংশ গ্ৰহণ কৰিছিল। ১৯৯৯ চনৰ মে’ মাহত পাকিস্তানী সেনাই LOC অতিক্ৰম কৰি Mushkoh, Dras, Kaksar, Yaldor আদি অঞ্চললৈ প্ৰায় ৪-৮ কিলোমিটাৰ আগুৱাই আহিছিল। এই অতি দুৰ্গম পাহাৰীয়া অঞ্চলবোৰত আক্ৰমণ চলোৱাটো এক বৃহৎ প্ৰত্যাহ্বান আছিল।
Jubar Ridge ত চূড়ান্ত আক্ৰমণ আৰু সৰ্বোচ্চ ত্যাগ
কেপ্টেইন গগৈৰ ইউনিটক Jubar Ridge ৰ পশ্চিম ফ্ল্যাংকৰ উত্তৰ শিখৰ, বিশেষকৈ Bump III, Kala Pathar আৰু Mound দখল কৰাৰ গুৰুত্বপূৰ্ণ দায়িত্ব দিয়া হৈছিল। ১৯৯৯ চনৰ ২৯/৩০ জুনৰ গভীৰ ৰাতি, কেপ্টেইন গগৈয়ে তেওঁৰ ভাৰতীয় সেনাক লক্ষ্যস্থানলৈ নেতৃত্ব দি আগুৱাই গৈছিল।
প্ৰায় ১ কিলোমিটাৰ দুৰ্গম পাহাৰ বগাই আগবঢ়াৰ পিছত, তেওঁ আৰু তেওঁৰ সৈতে যোৱা সৈনিকসকল পাকিস্তানী সেনাৰ চকুত পৰে আৰু তেওঁলোকক ঘেৰাও কৰি আত্মসমৰ্পণ কৰিবলৈ কোৱা হয়। কিন্তু কেপ্টেইন গগৈয়ে তেওঁৰ ৰেজিমেণ্টৰ বাণী “Yudhaya Krit Nischya” (সংকল্পৰ সৈতে যুদ্ধ কৰক) সাৰোগত কৰি অদ্ভুত সাহসৰ পৰিচয় দিয়ে। তেওঁ গৰ্জন কৰি উঠে “বদ্ৰী বিশাল লাল কি জয়” আৰু ওলোটা আক্ৰমণ আৰম্ভ কৰে।
কেপ্টেইন গগৈয়ে নিজেই কেইবাজনো পাকিস্তানী সৈন্যক গুলীয়াই নিধন কৰে। শত্ৰু পক্ষৰ মেছিন গানৰ গুলীয়ে তেওঁৰ শৰীৰ থকাসৰকা কৰাৰ পিছতো, অসমৰ এই বীৰ পুত্ৰ জিণ্টু গগৈয়ে শেষ নিশ্বাস পৰ্যন্ত শত্ৰু সেনাক গুলীয়াই যায়। তেওঁৰ নশ্বৰ দেহ লক্ষ্য স্থানৰ পৰা মাত্ৰ ১৫০ গজ দূৰত্বত পোৱা গৈছিল। এই অভিযানত কেপ্টেইন গগৈৰ সৈতে নায়ক শিৱ সিংহ, লেন্স নায়ক মদন সিংহ, আৰু আৰএফএন বীৰেন্দ্ৰ লালকে ধৰি ১১ জন ভাৰতীয় সেনা শ্বহীদ হয়, কিন্তু পাকিস্তানী সেনাৰো বিস্তৰ ক্ষতি হয়।
বীৰ চক্ৰ বঁটা আৰু শ্ৰদ্ধাঞ্জলি
জিণ্টু গগৈৰ চৰম ত্যাগৰ ফলত, ১৭ গঢ়ৱাল ৰাইফলছয়ে প্ৰচণ্ড আক্ৰমণ আৰম্ভ কৰি সফলতাৰে কালাপাথাৰ আৰু মুন্থো ধলো জটিলত পইন্ট ৫২৮৫ ভাৰতীয় সেনাৰ দখলত আনিবলৈ সক্ষম হয়।
অতি সাহস, নেতৃত্ব আৰু নিজৰ জীৱনৰ সুৰক্ষাৰ কথা পাহৰি দেশৰ হকে কৰা অদম্য অভাৱনীয় চৰম ত্যাগৰ বাবে, কেপ্টেইন জিন্টু গগৈক মৰণোত্তৰভাৱে ৰাষ্ট্ৰৰ তৃতীয়-সৰ্বোচ্চ যুদ্ধকালীন সাহসিকতা বঁটা ‘বীৰ চক্ৰ’ (Vir Chakra) প্ৰদান কৰা হৈছিল। আজি, তেওঁৰ জন্মস্থান খুমটাই এক তীৰ্থস্থানলৈ পৰিণত হৈছে।
অসমৰ বীৰ পুত্ৰ জিণ্টু গগৈক তেওঁৰ জন্ম দিনৰ এই পৱিত্ৰ দিনটোত আমি গভীৰ শ্ৰদ্ধাৰে স্মৰণ কৰিছোঁ। তেওঁৰ দেশপ্ৰেমৰ নিদৰ্শন চিৰদিন অমৰ হৈ থাকিব।
