পাতাল শব্দটোৰ অসমীয়া ৰূপান্তৰ হৈছে নৰক, অৱশ্যে পাতাল শব্দটো অসমীয়াতো আছে। শেহতীয়াকৈ এমেজন প্ৰাইম ভিডিঅ’ত মুক্তি পোৱা পাতাল লোক-২ নামাৰ ধাৰাবাহিকখনে বিশেষ চৰ্চা পাইছে। ইয়াৰ কাৰণটো ছিৰিজটোৰ আকৰ্ষণীয়তাৰ লগতে এইবাৰৰ চিত্ৰনাট্যখন উত্তৰ পূব ভাৰতৰ ৰাজ্য নাগালেণ্ড ভিত্তিক হোৱাৰ বাবেই দৰ্শকৰ উৎসুকতা বাঢ়িছে।
পাতাল লোক ধাৰাবাহিকখনত আমাৰ সমাজত সকলোৰে অলক্ষিতে অব্যাহত থকা এখন নৰকৰ কথা বৰ্ণনা কৰা হয়। পাতাল লোক-১ত পাঞ্জাৱ-উত্তৰ প্ৰদেশ-দিল্লীৰ তেনে কেতবোৰ পাতাল কথা জনোৱাৰ পাছত এইবাৰ দিল্লীৰ সৈতে সংযোগ ঘটাই নাগালেণ্ডৰ নৰক আখ্যান পাতাল লোক-২ত বৰ্ণনা কৰা হৈছে।
নাগালেণ্ডক লৈ মানুহৰ উৎসুকতা আছে। কেৱল নাগালেণ্ড বুলিয়েই নহয়, উত্তৰ পূবৰ ৰাজ্যকেইখনক লৈ অধিক জানিবলৈ সকলো আগ্ৰহী। পাতাল লোক-২ৰ ক্ষেত্ৰত অৱশ্যে দৰ্শক নিৰাশ নহয় কিয়নো পৰিচালক অভিনাশ অৰুণ ধাৱাৰে আৰু ক্ৰিয়েট’ৰ সুদীপ শৰ্মাই অতি নিখঁতভাৱে ক্ৰাইম থ্ৰিলাৰখনক নাগালেণ্ড-দিল্লীৰ কৌতুহলী কাহিনীৰে শুদ্ধ আৰু আকৰ্ষণীয় কৰি তুলিছে।
নাগালেণ্ডৰ সাৰ্বভৌমত্বৰ সংগ্ৰাম, কেন্দ্ৰ মানে দিল্লীৰ সৈতে মধ্যস্থতা, সহস্ৰাধিক নগা জনজাতীয় লোকৰ (যুৱ) মৃত্যু আদি কথাবোৰ আমি সকলোৱে জানোঁ। কিদৰে একাংশ নেতাই বৃহত্তৰ জনতাসমূহক গ্ৰেটাৰ নাগালিমৰ স্বপ্ন দি যুগ যুগ ধৰি মধ্যস্থতাৰ নামত এক ৰাজনীতি চলাই আহিছে সেয়া অসমৰ দৰে সন্ত্ৰাসজৰ্জৰ জনতাই বুজে। এই ৰাজনীতিয়ে একাংশ নগা যুৱচামৰ জীৱন ধ্বংস কৰি পেলাইছে আৰু আন একাংশই উচ্চ শিক্ষাৰে শিক্ষিত হৈ বিলাসী জীৱন কটাইছে।
উৎপাদনশীল বৃহৎ উদ্যোগ নথকাৰ পাছতো কেন্দ্ৰীয় পুঁজিৰ বদন্যতাত একাংশ নগাৰ বিলাসী জীৱন আৰু সাধাৰণ শ্ৰেণীৰ সংগ্ৰাম শোষিত-নিস্পেষিত সমাজৰ পৰিচয়। পাতাল লোক-২ত দেখুৱাৰ দৰে ড্ৰাগছৰ অবৈধ উদ্যোগ উত্তৰ পূবৰ কেতবোৰ ৰাজ্যৰ মূল উৎপাদনৰ আহিলা। শ শ যুৱক এই উদ্যোগৰ সৈতে জড়িত হৈ সন্ত্ৰাসৰো অংশ হৈ পৰিছে। বিভিন্ন জনগোষ্ঠীৰ সমাহাৰ নাগা জাতিত যিদৰে ভ্ৰাতৃঘাটি সংঘৰ্ষ এক নিত্য নৈমত্তিক ঘটনা ঠিক তেনেদৰে প্ৰতিটো জনগোষ্ঠীৰ প্ৰভুত্বও সাধাৰণ কথা।
উত্তৰ পূবৰ প্ৰতিখন ৰাজ্য সহজ-সৰল ব্যক্তিৰ সমাহাৰ বুলি কোৱা হয় যদিও এই প্ৰতিখন ৰাজ্যৰ সমাজবোৰ আকৌ যথেষ্ট জটিল। পৰিচয়ৰ ৰাজনীতি (Identity Politics) চলা এই ৰাজ্যকেইখনত দেখাত সকলো সৰল যদিও কোনো এক জনগোষ্ঠীক অসন্তুষ্ট কৰা মানেই অশান্তিৰ আৰম্ভণি। পাতাল লোক-২ত তাৰেই আভাস পোৱা যায়।
Parallel চৰকাৰ মানে সমান্তৰাল চৰকাৰৰ প্ৰচলন থকা নাগালেণ্ড-মণিপুৰ আদি ৰাজ্যত কিদৰে স্বজাতিৰ মাজত বিভেধ সৃষ্টি হয় সেয়া ধাৰাবাহিকখনত প্ৰতিফলন ঘটিছে। মণিপুৰত বিগত বৰ্ষত(২০২৪ত) কিয় হত্যালীলা চলিছিল তাৰেই এক আংশিক ছবি পাতাল লোক-২ৰ এক দৃশ্য য’ত নাগালেণ্ড স্থানীয় আৰক্ষীয়ে উন্মুক্ত জনতাক চিকিৎসালয়ত প্ৰৱেশত বাধা দিয়াৰ সময়ত উদ্ভৱ হোৱা পৰিস্থিতিৰ জৰিয়তে বুজিব পাৰি।
পাতাল লোক-২ত আমাৰ বাবে ভাল লগা দিশটো হৈছে নাগামীজৰ ব্যৱহাৰ। অসমীয়া ভাষা ব্যৱহাৰ কৰিবলৈ হীনমন্যতাত ভোগাসকলে অন্ততঃ এই কথাটোক লৈ গৌৰৱ কৰিব পাৰে যে উত্তৰ পূবৰ সংযোগী ভাষা অসমীয়াৰেই এক ৰূপান্তৰ এই নাগামীজত অসমীয়াৰ প্ৰভাৱ সৰ্বাধিক।
শেষত কওঁ, হিন্দী ছবিজগতে উত্তৰ প্ৰদেশ, ৰাজস্থান, কাশ্মীৰ, দিল্লী, হিমাচল-উত্তৰাখণ্ড আদি উত্তৰভাৰতীয় ৰাজ্যকেইখনৰ কাহিনী, পট ইমানদিনে ব্যৱহাৰ কৰি থকাৰ ফলত সেয়া ইতিমধ্যে Over Exposed হৈ গৈছে। OTT অহাৰ পাছত ইতিমধ্যে চলি থকা দক্ষিণৰ ছবি উদ্যোগেও সমানেই দক্ষিণৰ ৰাজ্যতেইখনক ভাৰতীয় দৰ্শকৰ কাষলৈ আনিছে। গতিকে এতিয়া উত্তৰ পূবৰ ৰাজ্যবোৰকলৈ আমি নতুন নতুন চৰিত্ৰ আৰু কাহিনী পোৱাটো খাটাং।
