ড০ হিমন্ত বিশ্ব শৰ্মা চৰকাৰৰ ১০০ দিন: সফলতাৰ অৱলোকন আৰু সংস্কাৰৰ প্ৰত্যাহ্বান

ড০ হিমন্ত বিশ্ব শৰ্মা নেতৃত্বাধীন অসম চৰকাৰৰ দ্বিতীয় কাৰ্যকালৰ ১০০ দিন সম্পূৰ্ণ হৈছে। এই উপলক্ষে জনগণবাৰ্তাৰ তৰফৰ পৰা মুখ্যমন্ত্ৰী হিমন্ত বিশ্ব শৰ্মা আৰু তেওঁৰ মন্ত্ৰীসভাক অভিনন্দন জনাইছোঁ। গণতন্ত্ৰত এখন নিৰ্বাচিত চৰকাৰৰ সফলতা কামনা কৰাটো বিৰোধিতা নহয়; বৰং সেয়া জনস্বাৰ্থৰ অংশ। চৰকাৰ সফল হ’লে লাভবান হয় চৰকাৰ নহয়—অসমৰ জনতা। কিন্তু ১০০ দিন পূৰ্ণ হোৱাৰ এই সময়খিনি অভিনন্দনৰ লগতে মূল্যায়নৰো সময়। এয়া চৰকাৰৰ কামৰ চূড়ান্ত ৰিপ’ৰ্ট কাৰ্ড (Report Card) নহয়, কিন্তু আগন্তুক পাঁচ বছৰৰ অগ্ৰাধিকাৰ, গতি আৰু শাসনশৈলীৰ কিছু ইংগিত ইতিমধ্যে পোৱা গৈছে।

যিবোৰ ক্ষেত্ৰত চৰকাৰৰ পদক্ষেপ উল্লেখযোগ্য

ড০ হিমন্ত চৰকাৰৰ দ্বিতীয় কাৰ্যকালৰ আৰম্ভণিতে কেইবাটাও গুৰুত্বপূৰ্ণ বিষয় আগবঢ়োৱা হৈছে।

• স্বাস্থ্যখণ্ডৰ সম্প্ৰসাৰণ: বিগত দশকত অসমৰ মেডিকেল কলেজ আৰু MBBS seat যথেষ্ট বৃদ্ধি পোৱাটো চৰকাৰৰ এটা উল্লেখযোগ্য সাফল্য। কেন্দ্ৰীয় চৰকাৰৰ তথ্য অনুসৰি, অসমত মেডিকেল কলেজৰ সংখ্যা ৬ৰ পৰা ২৪লৈ আৰু MBBS seat ৭২৬ৰ পৰা ১,৮২৫লৈ বৃদ্ধি পাইছে।

• ভূমি অধিকাৰ আৰু সামাজিক ন্যায়: চাহ বাগিচাৰ শ্ৰমিক আৰু আদিবাসী পৰিয়ালৰ ভূমি অধিকাৰৰ ক্ষেত্ৰতো চৰকাৰে ইতিমধ্যে বৃহৎ সংখ্যক পৰিয়ালক ভূমিৰ মালিকানা প্ৰদান কৰাৰ দাবী কৰিছে। এই বিষয়টো সামাজিক ন্যায় আৰু ভূমি অধিকাৰৰ দিশৰ পৰা গুৰুত্বপূৰ্ণ।

• প্ৰশাসনিক প্ৰকল্প আৰু আন্তঃগাঁথনি: ডিব্ৰুগড়ক অসমৰ দ্বিতীয় ৰাজধানী হিচাপে বিকশিত কৰাৰ সিদ্ধান্ত আৰু নতুন বিধানসভা ভৱন তথা বিভিন্ন বৃহৎ আন্তঃগাঁথনি প্ৰকল্পৰ পদক্ষেপে অসমৰ প্ৰশাসনিক আৰু আঞ্চলিক ভাৰসাম্যৰ ওপৰত নতুন আলোচনা সৃষ্টি কৰিছে।

• বানপীড়িত অঞ্চলৰ পুনৰ্গঠন: শেহতীয়াকৈ বানপীড়িত অঞ্চল পুনৰ্গঠন আৰু কেপিটেল এক্সপেণ্ডিচাৰ (Capital Expenditure)ৰ বাবে আগন্তুক পাঁচ বছৰত ₹১.৫ লাখ কোটি বিনিয়োগৰ পৰিকল্পনাৰ কথাও চৰকাৰে ঘোষণা কৰিছে। বানপীড়িত পৰিয়ালসমূহক DBT (Direct Benefit Transfer)ৰ জৰিয়তে আৰ্থিক সাহায্য প্ৰদান কৰাটোও তাৎক্ষণিক ৰিলিফ ব্যৱস্থাৰ ক্ষেত্ৰত এটা ইতিবাচক পদক্ষেপ। চৰকাৰৰ তথ্য অনুসৰি, ২০২৬ত বান সাহায্যৰ মুঠ পৰিমাণ ₹১৪৬.২৬ কোটি পাইছে।

এই পদক্ষেপসমূহক স্বীকাৰ কৰাটোও নিৰপেক্ষ সাংবাদিকতাৰ অংশ।

১০০ দিনৰ সাফল্যৰ লগতে কেইবাটাও কঠিন প্ৰশ্ন

এইবাৰ আহোঁ আনটো দিশলৈ। ২০২৬ৰ নিৰ্বাচনৰ পূৰ্বে বিজেপিৰ ইস্তাহাৰত ২ লাখ চৰকাৰী চাকৰি, বৃহৎ বিনিয়োগ আৰু বান সমস্যাৰ স্থায়ী সমাধানকে ধৰি একাধিক ডাঙৰ প্ৰতিশ্ৰুতি দিয়া হৈছিল। এতিয়া প্ৰশ্নটো হ’ল—এই প্ৰতিশ্ৰুতিসমূহৰ ৰূপায়ণৰ স্পষ্ট সময়সূচী (Implementation Calendar) ক’ত?

• নিয়োগ: যুৱ সমাজে কেৱল চাকৰিৰ সংখ্যা শুনিবলৈ নহয়, আনুষ্ঠানিক নিযুক্তিৰ অধিসূচনা (Notification) আৰু নিযুক্তি পত্ৰ (Appointment Letter) বিচাৰে।

• বিনিয়োগ: বিনিয়োগৰ ঘোষণা শুনিবলৈ নহয়, ক্ষেত্ৰভিত্তিক প্ৰকল্প (Ground-level projects) আৰু স্থানীয় নিযুক্তি বিচাৰে।

• বান মুক্ত অসম: ‘বানমুক্ত অসম’ৰ প্ৰতিশ্ৰুতি শুনিবলৈ নহয়, বানৰ সময়ত নিৰাপত্তা, আগতীয়া সতৰ্কীকৰণ, উপযুক্ত নাৰ্দমা ব্যৱস্থা (Drainage), জলাশয় সংৰক্ষণ (Wetland Protection) আৰু বৈজ্ঞানিক বান ব্যৱস্থাপনা বিচাৰে।

এইবাৰৰ বান—এক গভীৰ সতৰ্কবাণী

২০২৬ৰ ভয়ংকৰ বান অসমৰ বাবে এক গভীৰ সতৰ্কবাণী। সাম্প্ৰতিক বিশ্লেষণ অনুসৰি এই বানত ১০০ৰো অধিক লোকৰ মৃত্যু আৰু ৭ লাখৰো অধিক লোক স্থানচ্যুত হৈছিল। বিশেষজ্ঞসকলে অতিবৃষ্টি, বনধ্বংস, বালু খনন, অপৰিকল্পিত নগৰায়ণ আৰু দুৰ্বল আগতীয়া সতৰ্কীকৰণৰ দৰে বহু কাৰকৰ কথা উল্লেখ কৰিছে।

সেয়ে বানৰ পিছত কেৱল ক্ষতিপূৰণ নহয়—কাৰণ বিশ্লেষণ আৰু গঠনমূলক সংস্কাৰ (Structural Reform) প্ৰয়োজন। চৰকাৰে ৰূপনগৰ-শ্ৰীমন্তপুৰ জৱলাশয়ক প্ৰাকৃতিক পানী সংৰক্ষণ স্থান (Natural water-retention space) হিচাপে সংৰক্ষণৰ নিৰ্দেশ দিয়াটো এই দিশত এটা আদৰণীয় পদক্ষেপ। কিন্তু এনে পদক্ষেপ গুৱাহাটীৰ প্ৰতিটো জলাশয়, নদী, নলা আৰু প্লাৱন ভূমিলৈ (Floodplain) সম্প্ৰসাৰিত হ’ব লাগিব।

বিত্তীয় শৃংখলা—এতিয়া অধিক স্বচ্ছতা প্ৰয়োজন

CAG-ৰ ২০২৪-২৫ৰ ৰাজ্যিক বিত্তীয় অডিট ৰিপ’ৰ্টে (State Finances Audit Report) ইতিমধ্যে অসম চৰকাৰৰ বিত্তীয় ব্যৱস্থাপনাৰ ওপৰত কেইবাটাও গুৰুত্বপূৰ্ণ প্ৰশ্ন উত্থাপন কৰিছে।

• CAG-ৰ তথ্য অনুসৰি, ১৩টা ক্ষেত্ৰত ₹৫০৯.৫৯ কোটি টকা কোনো বাজেট উপবন্ধ (Budget Provision) নথকাৰ সময়ত ব্যয় কৰা হৈছিল।

• ₹২৩,২৪০ কোটিৰো অধিক মূল্যৰ ৬,৯২৯টা উপযোগিতা প্ৰমাণপত্ৰ (Utilization Certificate) ২০২৫ৰ ৩১ মাৰ্চলৈকে বাকী আছিল।

এইবোৰ বিষয় ২০২৬ৰ নতুন চৰকাৰৰ ১০০ দিনৰ ভিতৰত সৃষ্টি হোৱা নহয়। কিন্তু এতিয়া চৰকাৰৰ দায়িত্ব হৈছে—আগৰ অডিট পৰ্যবেক্ষণৰ শুধৰণি মূলক ব্যৱস্থা (Corrective Action) স্পষ্ট কৰা। উন্নয়ন আৰু বিত্তীয় শৃংখলা একেলগে চলিব লাগিব।

অসম চুক্তি, Clause 6 আৰু ছয় জনগোষ্ঠীৰ ST দাবী

অসম চুক্তিৰ Clause 6 বাস্তৱায়ন এতিয়াও অসমৰ ৰাজনৈতিক আৰু সামাজিক আলোচনাৰ অন্যতম কেন্দ্ৰীয় বিষয়। চৰকাৰৰ নিজা অসম চুক্তি ৰূপায়ণ বিভাগৰ (Assam Accord Implementation Department) তথ্যত Clause 6 আৰু সাংবিধানিক সুৰক্ষাৰ বিষয়ত বিভিন্ন পদক্ষেপৰ কথা উল্লেখ আছে। কিন্তু অসমৰ জনসাধাৰণে এতিয়া অধিক স্পষ্ট ৰূপৰেখা (Roadmap) বিচাৰে।

একেদৰে কোচ-ৰাজবংশী, টাই আহোম, চুতীয়া, মৰাণ, মটক আৰু চাহ জনগোষ্ঠীৰ ST মৰ্যাদাৰ দাবীৰ ক্ষেত্ৰতো প্ৰতিশ্ৰুতিৰ পৰা সিদ্ধান্তলৈ যোৱাৰ সময় আহি পৰিছে। এই বিষয়বোৰ কেৱল নিৰ্বাচনী প্ৰতিশ্ৰুতি হৈ থাকিব নালাগে।

সীমান্ত সমস্যা, নগৰীয়া সংকট আৰু ৰাজহুৱা সম্পত্তি

• সীমান্ত আৰু নাগৰিক জীৱন: চুবুৰীয়া ৰাজ্যসমূহৰ সৈতে অসমৰ সীমান্ত সমস্যা এতিয়াও সম্পূৰ্ণৰূপে সমাধান হোৱা নাই। একেদৰে গুৱাহাটীৰ কৃত্ৰিম বান, যানজঁট, আবৰ্জনা, নলা-নৰ্দমা, পাহাৰ কটা আৰু নগৰ পৰিকল্পনাৰ সমস্যাও এতিয়াও নাগৰিক জীৱনৰ ডাঙৰ প্ৰত্যাহ্বান। ডাঙৰ আন্তঃগাঁথনি প্ৰকল্পৰ লগতে দৈনন্দিন নাগৰিক সেৱাৰ মান উন্নত কৰাটোও সমানেই গুৰুত্বপূৰ্ণ।

• সম্পত্তি ব্যৱস্থাপনা: উদ্যোগ, বিনিয়োগ আৰু আন্তঃগাঁথনি বিকাশৰ বাবে চৰকাৰী ভূমি বা সম্পত্তি ব্যৱহাৰ কৰাটো স্বাভাৱিক। কিন্তু যিকোনো লিছ (Lease), আৱণ্টন (Allotment) বা ভূমি ব্যৱহাৰৰ সিদ্ধান্তৰ ক্ষেত্ৰত মূল্যায়ন, চৰ্ত, ম্যাদ (Tenure), ৰাজহুৱা সুবিধা আৰু স্বচ্ছতা সম্পৰ্কীয় তথ্য যিমান সম্ভৱ ৰাজহুৱা কৰা উচিত। কাৰণ চৰকাৰী সম্পত্তি কোনো ব্যক্তিগত বা দলীয় সম্পত্তি নহয়—সেয়া অসমৰ জনসাধাৰণৰ সম্পদ।

১০০ দিনৰ পিছত আমাৰ মূল্যায়ন

এখন নিৰপেক্ষ সংবাদ মাধ্যমৰ দায়িত্ব চৰকাৰক কেৱল প্ৰশংসা কৰা নহয়, বা চৰকাৰৰ প্ৰতিটো কামক ব্যৰ্থ বুলি ঘোষণা কৰাও সংবাদ সেৱা নহয়। সাফল্যক সাফল্য বুলি কোৱা আৰু ব্যৰ্থতাক ব্যৰ্থতা বুলি কোৱা—দুয়োটাই স্বাধীন সংবাদ মাধ্যমৰ দায়িত্ব। ড০হিমন্ত বিশ্ব শৰ্মা চৰকাৰক সেয়ে আমাৰ শুভেচ্ছা—আগন্তুক দিনত চৰকাৰে অধিক সফল হওক, অধিক স্বচ্ছ হওক আৰু অধিক জবাবদিহিমূলক হওক।

১০০ দিনৰ পিছত এতিয়া কামৰ গতি আৰু ফলাফল দুয়োটাই পৰীক্ষা কৰা হ’ব:

• চৰকাৰে ২ লাখ চাকৰিৰ প্ৰতিশ্ৰুতি দিছে—আমি নিয়োগৰ সংখ্যা অনুসৰণ কৰিম।

• চৰকাৰে বানমুক্ত অসমৰ লক্ষ্য লৈছে—আমি বান ব্যৱস্থাপনা আৰু বাস্তৱ ফলাফল অনুসৰণ কৰিম।

• বৃহৎ বিনিয়োগৰ লক্ষ্য ঘোষণা কৰা হৈছে—আমি ক্ষেত্ৰভিত্তিক বিনিয়োগ, সংস্থাপন আৰু ৰাজহ সংগ্ৰহ অনুসৰণ কৰিম।

• CAG-এ বিত্তীয় প্ৰশ্ন তুলিছে—আমি সংশোধনমূলক পদক্ষেপ অনুসৰণ কৰিম।

• Clause 6, ST Status, সীমান্ত সমস্যা, ভূমি নীতি, গুৱাহাটীৰ নাগৰিক সংকট—এই সকলো বিষয় জনসাধাৰণৰ আগত তথ্যসহ উপষ্ঠাপিত কৰা হ’ব।

জনগণবাৰ্তাৰ প্ৰতিশ্ৰুতি: জনগণবাৰ্তা কোনো চৰকাৰৰ বা বিৰোধী দলৰ মুখপাত্ৰ নহয়। আমাৰ পক্ষ কেৱল জনস্বাৰ্থ আৰু তথ্যৰ পক্ষ। সেয়ে আগন্তুক পাঁচ বছৰত আমি চৰকাৰৰ প্ৰতিটো ডাঙৰ প্ৰতিশ্ৰুতি, বাজেট, নীতি, প্ৰকল্প আৰু ফলাফলৰ ওপৰত নজৰ ৰাখিম। প্ৰশংসাৰ প্ৰয়োজন হ’লে প্ৰশংসা কৰিম, প্ৰশ্ন কৰাৰ প্ৰয়োজন হ’লে প্ৰশ্ন কৰিম। কাৰণ গণতন্ত্ৰত এখন শক্তিশালী চৰকাৰৰ সমান্তৰালভাৱে এখন শক্তিশালী, স্বাধীন আৰু দায়িত্বশীল সংবাদ মাধ্যমৰ প্ৰয়োজন।

১০০ দিন শেষ; এতিয়া আৰম্ভ হৈছে প্ৰতিশ্ৰুতি পূৰণৰ পৰীক্ষা (Delivery Test)।